મુક્તક – સૈફ પાલનપુરી

કોઈ સ્મિતે સ્મિતે સળગે છે

કોઈ રડીને દિલ બહેલાવે છે

કોઈ ટીપે ટીપે તરસે છે

કોઈ જામ નવા છલકાવે છે

સંજોગના પાલવમાં છે બધું

દરિયાને ઠપકો ના આપો

એક તરતો માણસ ડૂબે છે

એક લાશ તરીને આવે છે

- સૈફ પાલનપુરી

મુક્તક – ઘાયલ

ચડી આવે કદી ભૂખ્યો કોઈ હાંકી કહાડે છે   

નથી કાંઈ પેટ જેવું અન્નકૂટ એને જમાડે છે

કરાવે છે મકાનો ખાલી મંદિર બાંધવા માટે

અહીં માનવને મારી લોક ઈશ્વરને જિવાડે છે

*

અમૃતથી હોઠ સહુના એંઠા કરી શકું છું

મૃત્યુના હાથ પળમાં હેઠા કરી શકું છું

આ મારી શાયરી એ સંજીવની છે ઘાયલ

શાયર છું પાળિયાને બેઠા કરી શકું છું

- અમૃત ઘાયલ

મુક્તક – ચિનુ મોદી ‘ઈર્શાદ’

                                     પથ્થરો પોલા નીકળશે શી ખબર ?
                                     મિત્ર સહુ બોદા નીકળશે શી ખબર?
                                     એમની આંખો ભીંજાઈ’તી ખરી,
                                     આંસુઓ કોરા નીકળશે શી ખબર?

                                      - ચિનુ મોદી ‘ઈર્શાદ’

મુક્તક – અમૃત ઘાયલ

                                      જર  જોઇએ,  મને  ન ઝવેરાત જોઇએ,
                                      ના  જોઇએ મિરાત, ન મ્હોલાત જોઇએ;
                                      તારા સિવાય જોઇએ ના અન્ય કંઇ મને,
                                      મારે  તો દોસ્ત તારી મુલાકાત  જોઇએ.

                                       

કહેતા નથી – મરીઝ

આ  મહોબ્બત છે  કે  છે એની  દયા  કહેતા નથી
એક   મુદ્દત થઈ  કે  તેઓ હા  કે  ના કહેતા નથી
બે જણા દિલથી મળે તો એક મજલીસ છે ‘મરીઝ’
દિલ  વિના  લાખો મળે  એને  સભા કહેતા નથી !

-’મરીઝ’